32 ölkə, 440 şirkət, 11 qrup
Bakı Ekspo Mərkəzində Azərbaycan Beynəlxalq Qida Sənayesi və Azərbaycan Beynəlxalq Kənd Təsərrüfatı sərgiləri keçirilir. Prezident İlham Əliyev mayın 15-də sərgilərlə tanış olub.
Arayışa görə, 32 ölkəni təmsil edən 440 şirkəti, eləcə də 11 milli və regional qrupu bir araya gətirən sərgilərdə Azərbaycanla yanaşı Litva, Rusiya, Sloveniya, Ukrayna, Xorvatiya və digər ölkələri təmsil edən şirkətlər də yer alır. Bu il İtaliya, Türkiyə və Şri-Lanka sərgidə milli stendlərlə çıxış edirlər.
Prezidentə aqrar məşğulluğun artırılması layihəsi barədə məlumat verilib. O, “Azersun”, “Grow Group Azərbaycan”, CASE, “Grimme”, “Agro Dairy”, CLAAS, “John Deer”, “Rostselmaş”, “Cahan Tobacco”, “Lindsay”, “Geoflow”, METAK, GİLAN, İMAGRO, “Agronaft”, “Prior Leasing” şirkətlərinin, Gəncə Avtomobil Zavodunun, Kiçik və Orta Biznesin İnkişafı Agentliyinin, Azərbaycan Qida Təhlükəsizliyi Agentliyinin, Kənd Təsərrüfatı Nazirliyinin, Rusiyanın Başqırdıstan Respublikasının, Belarusun, İtaliyanın, Türkiyənin, Niderlandın, Gürcüstanın stendlərinə baxıb.
Sərgilərdə “Made in Azerbaijan” brendi altında ət və süd məhsulları, çay, bal, şirələr və milli istehsalçıların digər məhsulları, eyni zamanda suvarma sistemləri, istixanalar və heyvandarlıq təsərrüfatları üçün avadanlıqlar, yem və toxumlar, kənd təsərrüfatı texnikası, baytarlıq preparatları, laboratoriya qurğuları və digər avadanlıqlar nümayiş olunur.
