İxracın 91,6 faizi neft və qazdır
2019-cu ilin dörd ayı üzrə xarici ticarət hesabatı açıqlanıb. Novator.az bildirir ki, Dövlət Gömrük Komitəsinin məlumatına görə, yanvar-aprel aylarında Azərbaycanın xarici ticarət əməliyyatlarının həcmi 11,6 milyard dollar olub. Bunun 7 milyard 89,9 milyon dolları ixrac, 4,5 milyard dolları idxaldır.
Dörd ayda 161 ölkə ilə ticarət əməliyyatı aparılıb, gömrük orqanları büdcəyə 1 milyard 391,8 milyon manat ödəyib.
İxracın 80,1 faizi xam neft və xam neft məhsulları, 2,5 faizi neft məhsulları, 9 faizi təbii qaz, 2,1 faizi meyvə-tərəvəzdir.
İdxalın 18,6 faizi maşın, mexanizm, elektrik aparatları, avadanlıqlar və onların hissələri, 11,6 faizi yeyinti məhsulları, 7,8 faizi nəqliyyat vasitələri və onların hissələri, 6,9 faizi qara metallar və onlardan hazırlanan məmulatlar, 2,5 faizi plastmassa və ondan hazırlanan məmulatlar, 1,8 faizi oduncaq və ondan hazırlanan məmulatlar, 1,8 faizi əczaçılıq məhsulları, 1,6 faizi geyim əşyaları və geyim üçün ləvazimat kimi rəsmiləşib.
Yanvar-aprel aylarında ixracın 4,7 faizi MDB ölkələrinin, 56,7 faizi Avropa İttifaqı ölkələrinin, 38,6 faizi digər ölkələrin payına düşüb.
İdxalda MDB-nin payı 22,4 faiz, Avropa İttifaqının payı 16,9 faiz, digər ölkələrin payı 60,7 faiz göstərilir.
Dörd ayda əsas tərəfdaş İtaliya olub. Bu ölkə ilə ticarət dövriyyənin 19,3 faizi həcmində rəsmiləşib. Türkiyə 10,3 faizlə ikinci, Çin 8 faizlə üçüncüdür.
İxracda əsas ölkə İtaliya (29,8 faiz), idxalda İsveçrədir (16,2 faiz).
