Ermənistan: inqilabdan sonra nə qədər iş yeri açılıb?
2018-ci il mayın 1-dən 2019-cu il aprelin 1-dək Ermənistanda 262 min 114 yeni iş yeri yaradılıb. Novator.az-ın məlumatına görə, Ermənistanın Dövlət Gəlirləri Komitəsi belə hesabat yayıb.
Rəsmi açıqlamada qeyd olunur ki, 11 ayda emal sənayesində 38 mindən çox, tikintidə 16 mindən çox, kənd təsərrüfatı sahəsində 5,6 min yeni iş yeri açılıb.
Yeni iş yerlərinin 65,1 mini ticarətin və nəqliyyat təmiri müəssisələrinin, 28,2 mini mehmanxana biznesi və ictimai iaşə obyektlərinin, 20,3 mini təhsil sahəsinin, 8 mindən çoxu informasiya və rabitə sektorunun payına düşür.
1998-ci ildən Ermənistanda ali icra hakimiyyətinə Qarabağ erməniləri başçılıq edib. 2008-ci ilədək prezident postunu Robert Köçəryan, 2018-ci il aprelin 9-dək Serj Sərkisyan tutub. Həmin gündən ali icra hakimiyyətinin rəhbəri statusu baş nazirə keçib. Serj Sərkisyan aprelin 17-də baş nazir kürsüsünə oturub, ancaq aprelin 23-də xalq etirazlarına görə istefa verib.
Həmin il mayın 8-dən xalq etirazlarının lideri Nikol Paşinyan baş nazirdir. 1975-ci ildə Ermənistanın İcevan şəhərində doğulan Nikol Paşinyan əsası 2013-cü ildə qoyulmuş Vətəndaş Sazişi Partiyasının başçısıdır.
