Belçikadakı səfirlik yenilənib
Prezident İlham Əliyev mayın 14-də Belçika Krallığına səfərini başa vurub. AZƏRTAC-ın məlumatına görə, həmin gün o, Brüsseldə Azərbaycan səfirliyinin yeni binasının açılışına qatılıb.
Dövlət başçısını Azərbaycanın Belçikadakı səfiri Fuad İsgəndərov və binanın dizayneri Filip Vanhereveqe bilgiləndiriblər.
Tervuren prospektində yerləşən binanı 2014-cü ildə Azərbaycan səfirliyi alıb. İçərisi əsaslı təmir edilən, fasadı yenilənən bina Avropa təsisatlarına çox yaxın məsafədədir.
Prezident binada yaradılan şəraitlə tanış olub. Arayışa əsasən, binanın girişi dövlət rəmzləri ilə bəzədilib. Burada dünyanın müxtəlif şəhərlərinin məşhur muzeylərində saxlanan Azərbaycan xalçalarının fotoları, həmçinin 1870-ci il Təbriz xalçası nümunəsində əllə toxunmuş xalça var.
Daxili tərtibat işləri zamanı Qobustan qayaüstü rəsmlərinə də yer ayrılıb. Binanın birinci və ikinci mərtəbələri səfirliyin iş otaqları üçün nəzərdə tutulub. Binada həmçinin səfirlik işçilərinin mənzilləri yerləşir.
