Bələdiyyə seçkiləri: qanun nə deyir?
Dekabrın 27-si Azərbaycanda bələdiyyə seçkiləri keçirilməlidir. Bu, ölkədə bələdiyyə institutu yaradılandan bəri beşinci seçkilər olacaq. Əvvəlki seçkilər 12 dekabr 1999-cu ilə, 17 dekabr 2004-cü ilə, 23 dekabr 2009-cu ilə, 23 dekabr 2014-cü ilə düşüb.
Novator.az bildirir ki, Seçki Məcəlləsinə görə, əhalisi 500-dən az olan ərazilərdə 5 bələdiyyə üzvü; 999-dək olan ərazilərdə 7 bələdiyyə üzvü; 4999-dək olan ərazilərdə 9 bələdiyyə üzvü; 9999-dək olan ərazilərdə 11 bələdiyyə üzvü; 19999-dək olan ərazilərdə 13 bələdiyyə üzvü; 49999-dək olan ərazilərdə 15 bələdiyyə üzvü; 99999-dək olan ərazilərdə 17 bələdiyyə üzvü; 299999-dək olan ərazilərdə 19 bələdiyyə üzvü seçilir.
Bələdiyyələrin səlahiyyət müddəti 5 ildir. Səlahiyyət müddətinin hesablanması səsvermənin keçirildiyi gündən başlanır və yeni seçilən bələdiyyələrin birinci iclas günü başa çatır.
Seçkilərdə iştirak etmək hüququ olan və müvafiq seçki dairəsində daimi yaşayan Azərbaycan vətəndaşları bələdiyyələrə üzv seçilə bilərlər.
Bələdiyyə üzvlüyünə namizəd kimi qeydə alınmaq üçün namizədliyi irəli sürülmüş vətəndaş əhalisi 99999-dan çox olan ərazidə 150 imza; 49999-dan çox olan ərazidə 100 imza; 19999-dan çox olan ərazidə 75 imza; 9999-dan çox olan ərazidə 50 imza; 4999-dan çox olan ərazidə 30 imza; 4999-dan az olan ərazidə 15 imza toplamalıdır.
Mərkəzi Seçki Komissiyası seçkilər günündən başlayaraq ən geci 25 gün müddətində bələdiyyə seçkilərinin yekunlarını elan etməlidir. Bu qərar qətidir.
