Almaniyada Azərbaycan aksiyası
Müsavat Partiyasının Avropa Koordinasiya Mərkəzi (AKM) mayın 13-ü Almaniyanın Nürnberq şəhərində aksiya keçirib. “Azad TV”nin məlumatına görə, aksiyada Azərbaycandakı siyasi məhbusların azad olunması, repressiyalara son qoyulması tələb edilib. Aksiya iştirakçıları Azərbaycanın və Müsavat Partiyasının bayraqlarını, siyasi məhbusların şəkillərini və müxtəlif plakatlar qaldırıblar.
Fəal Emin Rüstəmlinin Bastainfo.com-a verdiyi məlumata görə, siyasi məhbus Azad Həsənovun xanımı Təranə Həsənova, AKM-in koordinatorları Akif Nağıyev, Əhməd Cəlaloğlu və digərləri aksiyadakı çıxışlarında Azərbaycan hakimiyyətini tənqid edib, rejimin dəyişdirilməsi zərurətini vurğulayıblar.
Siyasi Məhbusların Vahid Siyahısı üzrə İşçi Qrupun (İntiqam Əliyev, Xədicə İsmayıl, Anar Məmmədli, Xalid Ağalıyev, Rövşən Hacıbəyli və başqaları) siyahısında 70 məhbusun adı yer alır. Onların 50-si inanclı fəal, 7-si siyasi və ictimai fəal, 5-i jurnalist, 1-i hüquq müdafiəçisidir.
Keçmiş Xüsusi Təyinatlı Polis Dəstəsinin ömürlük həbs cəzasına məhkum olunan 3 üzvü, Səid Dadaşbəyli qrupundan 3 nəfər də siyasi məhbus sayılırlar.
1 məhbus siyasi girovlar bölümündədir.
