Liqalarda ingilis möhürü
UEFA Avropa Liqasının finalçıları bəlli olub. Novator.az-ın məlumatına görə, mayın 9-u İspaniyada yarımfinalın cavab oyununa çıxan İngiltərə “Arsenal”ı “Valensiya”ya üstün gəlib – 4:2. İlk oyunda da qələbə qazanan (3:1) ingilislər finala adlayıblar.
Londonda Almaniyanın “Ayntraxt” (Frankfurt) klubunu qəbul edən digər İngiltərə təmsilçisi “Çelsi” rəqibini penalti seriyasında (4:3) yenərək finala keçib. Komandaların əsas və əlavə vaxtda mübarizəsi ilk oyundakı hesabla bitib – 1:1.
Avropa Liqasının final matçı mayın 29-u Bakı Olimpiya Stadionunda keçiriləcək.
1971-ci ildən keçirilən, 2009-cu ilədək UEFA kuboku adlanmış Avropa Liqasında “Çelsi”nin 1 titulu var. “Arsenal” ikinci dəfədir finala çıxır.
Çempionlar Liqasının finalında da İngiltərə klubları – “Liverpul” və “Tottenhem” üz-üzə gələcək.
1955-ci ildə yaradılmış, 1992-ci ilə qədər Çempionlar kuboku adlanmış turnirdə “Liverpul” 5 zəfər əldə edib. İyunun 1-i İspaniya paytaxtı Madridin “Vanda Metropolitano” stadionunda keçiriləcək final matçı “Tottenhem” üçün siftədir.
