Parlament sədrinin İtaliya görüşləri
Mayın 8-də AZƏRTAC Milli Məclisin sədri Oqtay Əsədovun İtaliya səfərindən xəbər yayıb.
Səfər heyətinə İtaliya ilə parlamentlərarası əlaqələr üzrə işçi qrupunun başçısı Azər Kərimli, deputatlar Ülviyyə Ağayeva, Vahid Əhmədov, Elşad Həsənov, Milli Məclis Aparatının rəhbəri Səfa Mirzəyev və digər şəxslər daxildir.
İtaliya Senatının sədri ilə görüşündə Oqtay Əsədov deyib ki, iki ölkə arasında 44 ikitərəfli sənəd imzalanıb, bu sənədlərin biri Azərbaycan Respublikası ilə İtaliya Respublikası arasında strateji tərəfdaşlıq haqqında birgə bəyannamədir.
İtaliyanın Azərbaycanın ən böyük ticarət tərəfdaşı olduğunu vurğulayan parlament sədri deyib ki, TANAP, TAP, Cənub Qaz Dəhlizi layihələri əlaqələrin daha da inkişaf edəcəyinə inamı artırır: “Hazırda Azərbaycanda 50-dək italyan şirkəti fəaliyyət göstərir, bu şirkətlərin sayı getdikcə çoxalacaq”.
Milli Məclisin sədri Dağlıq Qarabağ münaqişəsi barədə də danışıb: “2010-cu ildə İtaliya Senatının Cənubi Qafqazda vəziyyət haqqında qətnamə qəbul edib Azərbaycanın ərazi bütövlüyünü dəstəkləməsi bizim üçün çox əhəmiyyətlidir”.
Oqtay Əsədov İtaliya Senatının Dağlıq Qarabağ münaqişəsinin beynəlxalq hüququn prinsipləri əsasında, Azərbaycanın ərazi bütövlüyü çərçivəsində həll olunmasına gələcəkdə də öz dəstəyini verəcəyinə inamını ifadə edib.
Oqtay Əsədov Deputatlar Palatasının sədri, İtaliya parlamentində İtaliya-Azərbaycan Dostluq Qrupunun və İtaliya-Azərbaycan Dostluq Assosiasiyasının üzvləri ilə də görüşüb.
