“Qarabağ”ın mümkün rəqibləri
2019-2020-ci illər mövsümündə Azərbaycanı UEFA Çempionlar Liqasında Ağdamın “Qarabağ” klubu təmsil edəcək.
Novator.az bildirir ki, “Qarabağ” turnirə təsnifat raundunun (25-28 iyun) ardınca – birinci mərhələdən (9-17 iyul) qoşulur. Güclülər səbətində yer alan “Qarabağ”ın mümkün rəqiblərindən bir neçəsi məlumdur: Macarıstandan “Ferensvaroş”, Estoniyadan “Nomme Kalyu”, İslandiyadan “Valyur”, Şimali İrlandiyadan “Linfild”, Farer adalarından “HB Torshavn”, Latviyadan “Riqa”, Gürcüstandan “Saburtalo”.
Turnirin ikinci mərhələsi 23-31 iyulda, üçüncü mərhələsi 6-13 avqustda, dördüncü – sonuncu ələmə mərhələsi 20-28 avqustda keçiriləcək.
Qrup raundu 17 sentyabr-11 dekabr arasına təyin olunub.
26 komanda qrup mərhələsinə birbaşa vəsiqə alır. Mayın 7-dək İspaniyadan “Barselona”, “Atletiko”, “Real”, İngiltərədən “Mançester Siti”, “Liverpul”, “Çelsi”, İtaliyadan “Yuventus”, “Napoli”, Almaniyadan “Bavariya”, “Borussiya” (Dortmund), “Leypsiq”, Fransadan PSJ, Rusiyadan “Zenit” qrupa vəsiqəni təmin ediblər.
“Qarabağ”la eyni mərhələdən “Seltik” (Şotlandiya), BATE (Belarus), “Astana” (Qazaxıstan), APOEL (Kipr), “Srvena Zvezda” (Serbiya), “Makkabi” (Tel-Əviv, İsrail), “Şerif” (Moldova), “Rusenborq” (Norveç), HİK (Finlandiya), “Dandolk” (İrlandiya), “Şkendiya” (Şimali Makedoniya), “Nyu Sents” (Uels), “Slovan” (Slovakiya), AİK (İsveç), “Suduva” (Litva), “Valletta” (Malta) komandalarının başlayacağı bilinir.
Ukraynadan “Şaxtyor”, Avstriyadan “Zalsburq”, İsveçrədən “Yanq Boyz” və “Bazel”, Çexiyadan “Slaviya”, Hollandiyadan PSV və “Ayaks”, Yunanıstandan PAOK və “Olimpiakos”, Xorvatiyadan “Dinamo”, Danimarkadan “Kopenhagen” də Çempionlar Liqasında oynayacaq.
