“Qarabağ” yenə birinci oldu
Azərbaycanda milli futbol çempionatının qalibi sona bir tur qalmış müəyyənləşib. Novator.az bildirir ki, ötən gün yüksək liqanın 27-ci turunda xal sayını 63-ə çatdıran Ağdamın “Qarabağ” klubu əlçatmaz olaraq 7-ci çempionluğunu rəsmiləşdirib.
“Qarabağ”ın əsası 1951-ci ildə qoyulub. 1977-ci ilədək komanda “Məhsul”, 1982-ci ilədək “Şəfəq”, 1988-ci ilədək “Kooperator” adı daşıyıb.
Azərbaycanın milli futbol çempionatı 1992-ci ildən keçirilir. O vaxtdan bəri “Qarabağ” daha 6 dəfə Azərbaycan çempionu olub.
1993-cü ildə Ağdam şəhəri işğal olunduqdan sonra komanda köçkün klub kimi fəaliyyət göstərir, hazırda Bakıda məskunlaşıb.
2008-ci ildən komandaya Qurban Qurbanov baş məşqçilik edir. Qurban Qurbanov 1972-ci ildə Zaqatalanın Aşağı Tala kəndində doğulub. Futbolçu karyerası ərzində Azərbaycanın “Daşqın”, “Turan”, “Kür-Nur”, “Neftçi”, “İnter”, Gürcüstanın “Mertsxali”, “Alazani”, Rusiyanın “Dinamo” (Stavropol), “Fakel”, “Baltika”, “Volqar” klublarında və Azərbaycanın milli komandasında hücumçu mövqeyində çıxış edib.
2006-cı ildə futbolçu karyerasını başa vuran Qurban Qurbanov əvvəl Bakının “İnter” klubunun idman direktoru vəzifəsində çalışıb, sonra “Neftçi”də baş məşqçi və idman direktoru vəzifələrini tutub.
Qurban Qurbanov 2008-ci ildə “Qarabağ”a baş məşqçi gələndən bəri komanda 6 dəfə Azərbaycan çempionu olub, 4 dəfə Azərbaycan kubokunu qazanıb. O, 2017-ci ilin noyabr ayından 2018-ci ilin dekabr ayınadək Azərbaycan milli komandasının da baş məşqçisi olub.
