Dörd nəfərin ölkədən çıxmasına yasaq götürüldü
Mayın 6-da jurnalistlər Natiq Cavadlı, İzolda Ağayeva, Səlimə Cəlilova və yazar Rasim Qaraca Baş Prokurorluğun Ağır Cinayətlərə Dair İşlər üzrə İstintaq İdarəsinə dəvət olunub. Onlara ölkədən çıxış məhdudiyyətlərinin götürüldüyü bildirilib.
Qadağalar 2015-ci ildən qüvvədə idi. Natiq Cavadlı Azadliq.org-a deyib ki, onları Ağır Cinayətlərə Dair İşlər üzrə İstintaq İdarəsinin rəisi Eldar Əhmədov çağırtdırıb və zərurətin aradan qalxması ilə əlaqədar ölkədən çıxış qadağasının ləğvi barədə imzaladığı bildirişi təqdim edib.
Fevral ayında Seçkilərin Monitorinqi və Demokratiyanın Tədrisi Mərkəzi Azərbaycanda hərəkət azadlığı və siyasi motivli səyahət qadağaları ilə bağlı dəyərləndirmə sənədi yaymışdı. Sənəddə qeyd olunmuşdu ki, ölkədən çıxışına qadağa qoyulan şəxslərdən 18 nəfəri jurnalist, 5 nəfəri siyasi fəal, 4 nəfəri hüquqşünas və hüquq müdafiəçisi, 2 nəfəri yazar, 1 nəfəri isə vətəndaş cəmiyyəti təşkilatı rəhbəridir.
Ölkədən çıxışına qadağa qoyulmuş jurnalistlərin bir qrupu mayın 3-də Baş Prokurorluğun Ağır Cinayətlərə Dair İşlər üzrə İstintaq İdarəsinin binası qarşısında etiraz aksiyası keçirib. Aksiyaya əsasən “Meydan TV” internet televiziyasının əməkdaşları qatılıblar. Onlar bildiriblər ki, 4 il qabaq prokurorluğun “Meydan TV”yə qarşı başladığı cinayət işi ilə əlaqədar ölkədən çıxışlarına yasaq qoyulub. Aksiya iştirakçıları yasağın ləğvini, eyni zamanda sözügedən cinayət işinə xitam verilməsini istəyiblər.
“Meydan TV” 2013-cü ildə yaradılıb. Qurumun baş ofisi Almaniyanın paytaxtı Berlində yerləşir. 2015-ci ildə Azərbaycanda kanalın qanunsuz maliyyələşdirilməsi ittihamı ilə cinayət işi başlanıb. 2017-ci il mayın 12-dən isə “Meydan TV” internet televiziyasının Meydan.tv saytına girişə Azərbaycan ərazisində məhdudiyyət qoyulub. Məhdudiyyət “İnformasiya, informasiyalaşdırma və informasiyanın mühafizəsi haqqında” qanun dəyişəndən sonra, Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin iddiası, Səbail Rayon Məhkəməsinin qərarı ilə tətbiq edilib.
