Vergi ombudsmanı təyin olunub
Vergilər nazirinin müşaviri Elçin Məmmədov vergi ombudsmanı təyin olunub. Rəsmi məlumata görə, mayın 3-də brifinq keçirən Elçin Məmmədov deyib ki, vergi ombudsmanı institutu vergilər nazirinin əmri ilə, vergi ödəyicilərinin hüquqlarının daha etibarlı qorunmasını təmin etmək üçün yaradılıb: “Bu institut vergi ödəyicilərinin müraciətlərinin məhkəmə müstəvisinə çıxmadan çevik həllinə nail olacaq və vergi orqanları ilə münasibətlərin qarşılıqlı əməkdaşlıq formasında tənzimlənməsinə köməklik göstərəcək.
Apellyasiya kommunikasiyalarının çoxluğu sahibkarın müraciətlərinə və şikayətlərinə ədalətli baxılması imkanlarını artırır. Vergi ombudsmanı institutu vergi ödəyiciləri ilə üfüqi əməkdaşlıq platformasını genişləndirir və vergi ödəyiciləri yeni bir apellyasiya mexanizmi əldə edirlər.
Vergilər Nazirliyinin əsas məqsədi vergi ödəyicilərinin baxılmamış, ədalətli araşdırmaya cəlb edilməmiş hər hansı müraciətinin qalmamasıdır. Ombudsman bu işdə onlara yardım edəcək, hüquqi müdafiəsini təmin edəcək, müraciətlərə ədalətli baxılması mövqeyindən çıxış edəcək. Bu həmçinin vergi əməkdaşlarının qəbul etdikləri qərarlara görə məsuliyyət daşımasına da böyük təsir göstərəcək”.
Vergi ombudsmanı bilavasitə nazirə tabe olan və ona hesabat verən şəxsdir. Ombudsmanın əsas fəaliyyət istiqaməti vergi ödəyicilərinin hüquqlarının pozulmasının qarşısının alınması və pozulmuş hüquqların bərpasıdır.
