Bir qrup jurnalist aksiya keçirib
Ölkədən çıxışına qadağa qoyulmuş jurnalistlərin bir qrupu mayın 3-də Baş Prokurorluğun Ağır Cinayətlərə Dair İşlər üzrə İstintaq İdarəsinin binası qarşısında etiraz aksiyası keçirib.
Seçkilərin Monitorinqi və Demokratiyanın Tədrisi Mərkəzinin bu ilin fevralında yaydığı hesabata görə, hazırda 18 jurnalistin ölkədən çıxışına qadağa var. Qadağalar 2013-cü ildən bəri tətbiq olunub. Jurnalistlərin bəzisi qadağanı qanunsuz saydıqlarından məhkəməyə müraciət edib. Ancaq həmin şikayətlərin əksəriyyəti təmin edilməyib.
3 may aksiyasına əsasən “Meydan TV” internet televiziyasının əməkdaşları qatılıblar. Onlar bildiriblər ki, 4 il qabaq prokurorluğun “Meydan TV”yə qarşı başladığı cinayət işi ilə əlaqədar ölkədən çıxışlarına yasaq qoyulub. Aksiya iştirakçıları yasağın ləğvini, eyni zamanda sözügedən cinayət işinə xitam verilməsini istəyiblər.
Polis plakatları aksiyaçılardan alaraq cırıb.
Aksiya iştirakçılarından ikisini isə prokurorluq işçiləri qəbul edib. Söhbət zamanı onlara deyilib ki, ölkədən çıxışa qoyulmuş məhdudiyyətlərin ləğvi prosesi artıq başlanıb və bu məsələ tezliklə həllini tapacaq.
“Meydan TV” 2013-cü ildə yaradılıb. Qurumun baş ofisi Almaniyanın paytaxtı Berlində yerləşir. 2015-ci ildə Azərbaycanda kanalın qanunsuz maliyyələşdirilməsi ittihamı ilə cinayət işi başlanıb. 2017-ci il mayın 12-dən isə “Meydan TV” internet televiziyasının Meydan.tv saytına girişə Azərbaycan ərazisində məhdudiyyət qoyulub. Məhdudiyyət “İnformasiya, informasiyalaşdırma və informasiyanın mühafizəsi haqqında” qanun dəyişəndən sonra, Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin iddiası, Səbail Rayon Məhkəməsinin qərarı ilə tətbiq edilib.
1993-cü ildə BMT-nin təşəbbüsü ilə mayın 3-ü dünyada Mətbuat Azadlığı Günü kimi rəsmiləşib.
