Atatürk təliminin əsas mərhələsi başlayıb. Açıqlamalar
Mayın 3-də Azərbaycan və Türkiyə ordularının “Mustafa Kamal Atatürk-2019” adlı birgə döyüş atışlı taktiki təliminin əsas mərhələsi başlayıb.
AZƏRTAC-ın məlumatına görə, Azərbaycan tərəfdən təlimin rəhbəri, polkovnik İlqar Lətifov bildirib ki, təlimin taktiki mövzusu hər iki dövlətin ordusunun taktiki qruplarının müdafiə olunan düşmənin üzərinə keçərək onun darmadağın edilməsi və düşmən mövqelərinin dərinliklərini, yüksəklikləri, ərazi qismini ələ keçirərək möhkəmlənməkdir.
Taktiki təlimlərə Azərbaycan və Türkiyədən 1000-dən çox şəxsi heyət, 60-a yaxın döyüş texnikası, 30 artilleriya qurğusu, 20-yə yaxın döyüş helikopterləri və digər döyüş teknikaları cəlb olunub.
Türkiyə tərəfdən təlimə qatılan qrupun rəhbəri, polkovnik Murat Dirik deyib ki, Azərbaycan və Türkiyə hərbçilərinin birgə əməkdaşlığı uzun illərdir davam edir: “Bu təlim də həmin tədbirlərdən biridir. Məqsəd birgə çalışmaq, bir-birimizi anlamaqdır. Türkiyədən 85 nəfərdən ibarət nümayəndə heyəti ilə gəlmişik. Ölkənizə gəldiyimiz gündən xalqın və Azərbaycan Silahlı Qüvvələrinin bizə göstərdiyi diqqət və qayğıdan məmnunuq. Bu, dostluq və qardaşlığımızın uzun illərə söykənməsindən xəbər verir”.
Mod.gov.az bildirir ki, mayın 3-də kütləvi informasiya vasitələri nümayəndələrinin taktiki təlim mərkəzinə səfəri təşkil edilib. Təlimlərə cəlb edilən şəxsi heyət və hərbi texnika ilə tanış olan jurnalistlər yerinə yetirilən tapşırıqların icrasını canlı olaraq müşahidə məntəqəsindən izləyiblər.
