Yeni ixrac icmalı açıqlanıb
İqtisadi İslahatların Təhlili və Kommunikasiya Mərkəzi yeni ixrac icmalı təqdim edib. Hesabata görə, 2019-cu ilin yanvar-mart aylarında Azərbaycanın ixracı ötən ilin müvafiq dövrünə nisbətən 34 faiz artaraq 4,5 milyard ABŞ dollarına çatıb: “Qeyri-neft sektoru üzrə ixrac 415 milyon dollara bərabər olub. Bu, 2018-ci ilin ilk rübü ilə müqayisədə 16,5 faiz artım deməkdir.
Birinci rüb ərzində ixrac edilən qeyri-neft sektoruna aid malların siyahısında elektrik enerjisi (38,4 milyon dollar) birinci, qabığı təmizlənmiş meşə fındığı (38,4 milyon dollar) ikinci, mahlıc (37,4 milyon dollar) üçüncü olub.
Üç ayda meyvə-tərəvəz ixracı 103,5 milyon, elektrik enerjisinin ixracı 38,4 milyon, plastmas və ondan hazırlanmış məmulatların ixracı 48,4 milyon, pambıq lifi ixracı 37,7 milyon, alüminium və ondan hazırlanmış məmulatların ixracı 22,3 milyon, kimya sənayesi məhsullarının ixracı 17,6 milyon, qara metallar və onlardan hazırlanmış məmulatların ixracı 11,6 milyon, alkoqollu və alkoqolsuz içkilərin ixracı 7,5 milyon, pambıq ipliyi ixracı 6,4 milyon dollar təşkil edib.
Ötən ilin müvafiq dövrü ilə müqayisədə pambıq lifinin ixracı 2,8 dəfə, alkoqollu və alkoqolsuz içkilərin ixracı 2,8 dəfə, plastmas və ondan hazırlanmış məmulatların ixracı 50 faiz, kimya sənayesi məhsullarının ixracı 42 faiz, pambıq ipliyinin ixracı 34 faiz, meyvə-tərəvəzin ixracı 28 faiz, elektrik enerjisinin ixracı 13 faiz artıb”.
