Paytaxtda iş və işsizlik
Məşğulluq xidməti orqanlarının Bakıda neçə işsiz qeydə aldığı açıqlanıb. Novator.az-ın məlumatına görə, Bakı Şəhər Statistika İdarəsi bildirir ki, 2019-cu il aprelin 1-nə paytaxtda 18 min 658 nəfər rəsmi işsiz olub, onların 530-u işsizlikdən sığorta ödənişi alıb. Sığorta ödənişinin orta aylıq məbləği 256,4 manat göstərilir.
Hesabata əsasən, işsiz şəxslərin 7 min 154 nəfəri qadınlardır.
Yanvar-fevral aylarında paytaxtda muzdlu işçilərin sayının 716 min 74 nəfərə çatdığı, orta aylıq nominal əməkhaqqının 794,1 manat olduğu qeyd edilir.
Sığorta ödənişi işçinin sığorta stajından asılı olaraq onun itirilmiş orta aylıq əməkhaqqının məbləğinə müəyyən faiz dərəcələri tətbiq olunmaqla hesablanır. İşçinin sığorta stajı 3 ildən 5 ilə qədər olduqda onun itirilmiş orta aylıq əməkhaqqının məbləğinin 50%-i, sığorta stajı 5 ildən 10 ilə qədər olduqda 55%-i, sığorta stajı 10 ildən yuxarı olduqda 60%-i məbləğində işsizliyə görə aylıq sığorta ödənişi verilir.
