Milli Şura imtina cavabı aldı
Bakı Şəhər İcra Hakimiyyəti Demokratik Qüvvələrin Milli Şurasının mayın 5-nə təyin etdiyi mitinqlə bağlı müraciətini mənfi cavablandırıb.
Paytaxtın Yasamal rayonundakı İdman-Sağlamlıq Kompleksinin stadionuna (metronun “İnşaatçılar” stansiyasının yaxınlığı) təyin olunmuş aksiyada siyasi və sosial tələblər qoymaq planlaşdırılırdı.
Novator.az bildirir ki, 2013-cü ildə yaradılmış Milli Şuraya tarixçi alim Cəmil Həsənli sədrlik edir. Qurumun öncül şəxsləri arasında AXCP sədri Əli Kərimli, Müsavat Partiyasından Tofiq Yaqublu, sabiq deputatlar İbrahim İbrahimli, Gültəkin Hacıbəyli və başqaları var.
2019-cu il yanvarın 19-da Milli Şura Yasamal rayonundakı İdman-Sağlamlıq Kompleksinin stadionunda mitinq keçirib. Bakı Şəhər İcra Hakimiyyətinin sanksiyalaşdırdığı aksiyada siyasi məhbuslara azadlıq tələb olunub, sosial tələblər irəli sürülüb.
Lakin Bakı Şəhər İcra Hakimiyyəti Milli Şuranın yanvarın 26-da, fevralın 23-də, martın 2-də, aprelin 6-da və 20-də eyni stadionda siyasi və sosial islahatlar tələbi ilə keçirmək istədiyi mitinqlərə razılıq verməyib. Meriya imtinaları Milli Şuranın 19 yanvar mitinqindən sonra ictimai asayişin pozulması ilə əsaslandırıb. 5 may aksiyası ilə bağlı müraciətə mənfi cavabda da həmin arqument yer alıb.
Milli Şura Yasamal rayonundakı İdman-Sağlamlıq Kompleksinin stadionuna daha bir mitinq təyin edib. Həmin aksiyanı mayın 11-də keçirmək planlaşdırılır.
