Bakıda orta maaş nə qədər artıb?
Bakı Şəhər Statistika İdarəsi sosial-iqtisadi göstəricilər açıqlayıb. Novator.az bildirir ki, rəsmi hesabata görə, 2019-cu ilin yanvar-mart aylarında paytaxt sənayesində istehsal olunmuş malların və göstərilmiş xidmətlərin həcmi əvvəlki ilin birinci rübü ilə müqayisədə 3,5 faiz artaraq 9,8 milyard manat təşkil edib. Sənayedə qeyri-dövlət sektorunun payı 83,4 faiz göstərilir.
İlk rübdə paytaxtın iqtisadi və sosial sahələrinin inkişafı üçün əsas kapitala 1 milyard 722,5 milyon manat və ya əvvəlki ilin müvafiq dövrü ilə müqayisədə 16,4 faiz az vəsait yönəldildiyi, ümumi sərmayənin 32,6 faizinin dövlət, 67,4 faizinin qeyri-dövlət sektoru sərmayədarlarının payına düşdüyü vurğulanır.
Açıqlamaya əsasən, yanvar-mart aylarında ticarət dövriyyəsinin həcmi 2018-ci ilin ilk rübü ilə müqayisədə 3 faiz, iaşə dövriyyəsi real ifadədə 4 faiz, əhaliyə göstərilən ödənişli xidmətlərin dəyəri real ifadədə 0,5 faiz artıb.
2019-cu yanvar-fevral aylarında işçilərin orta aylıq nominal əməkhaqqının əvvəlki ilə nisbətən 6,5 faiz artaraq 794,1 manata çatdığı qeyd olunur.
