Naxçıvanda “Biznesin qaydaları” təlimi keçirilib
“Dan” Beynəlmiləlçi Gənclər İctimai Birliyi Naxçıvan şəhərində “Biznesin qaydaları” adlı təlim keçirib.
Təlim aprelin 18-19-da “Gənclərin sahibkarlığı – iqtisadi inkişafın əsas mühərriki kimi” layihəsi çərçivəsində baş tutub.
Sözügedən layihəni “Dan” Beynəlmiləlçi Gənclər İctimai Birliyi Azərbaycan Respublikası Gənclər Fondunun maliyyə dəstəyi ilə reallaşdırır.
“Gənclərin sahibkarlığı – iqtisadi inkişafın əsas mühərriyi kimi” layihəsinin əsas məqsədləri gənclərin məşğulluğunun, biznes haqda məlumatının artırılmasına, gənclər arasında sahibkarlığın, gənclərin özünüidarə və iqtisadi baxımdan təminetmə bacarıqlarının inkişaf etdirilməsinə nail olmaq, gənclərə öz bizneslərini yaratmaqda dəstək verməkdir.
Təlimlərdə iştirakçılara biznesin təşkili və idarə edilməsi, satışın həyata keçirilməsi, rəqəmsal marketinq, maya dəyərinin qiymətləndirilməsi, sifarişçilərlə sənədləşmənin aparılması kimi mövzularda ətraflı məlumatlar verilib.
Ümumilikdə təlimlərdə 70-ə yaxın gənc iştirak edib.
Təlimlərdə bir neçə gəncin start-up layihələri təlimçilərlə birlikdə müzakirə olunub.
Sonda iştirakçılar şəhadətnamələrlə təltif ediliblər.
