Bayram Məmmədov azadlığa çıxıb
Gənc fəal Bayram Məmmədov 30 sutkalıq həbs cəzasını başa vuraraq azadlığa çıxıb.
Bayram Məmmədova inzibati həbs cəzasını martın 30-da Sabunçu Rayon Məhkəməsi vermişdi. Gənc fəal polisin qanuni tələbinə tabe olmamaqda təqsirli bilinmişdi.
Bayram Məmmədov qərarı siyasi sifariş sayır. O, inzibati həbs məntəqəsində işgəncələrə və təhqirlərə məruz qaldığını bəyan edib. Aprelin birinci ongünlüyündə gənc fəalın şikayətinə baxan Bakı Apellyasiya Məhkəməsi həbs qərarını qüvvədə saxlayıb, işgəncə şikayətinin araşdırılması üçün isə prokurorluğa təqdimat göndərilməsinə qərar verib.
Bayram Məmmədov digər gənc fəal Qiyas İbrahimovla birgə 2016-cı il mayın 10-dan həbsdə olub. Həmin il Bakı Ağır Cinayətlər Məhkəməsi onları külli miqdarda narkotik vasitə saxlamaqda təqsirli bilərək 10 il müddətinə azadlıqdan məhrum edib. Sonradan Qiyas İbrahimovun cəzası 3 ay artırılıb.
Müdafiəçiləri onların həbsini siyasi sifariş sayıb. Onlar bildiriblər ki, 2016-cı il mayın 10-na keçən gecə mərhum prezident Heydər Əliyevin Bakının mərkəzindəki abidəsinə etiraz şüarları yazılıb, gənclər bu şüarlara görə tutulublar.
2019-cu il martın 17-də hər iki gənc prezidentin əfv sərəncamı ilə azadlığa buraxılıb.
