7-ci zirvə?
Azərbaycanın milli futbol çempionatı yekunlaşmaq üzrədir. Novator.az bildirir ki, yüksək liqada qələbəyə Ağdamın “Qarabağ” klubu daha yaxın görünür.
“Qarabağ”ın əsası 1951-ci ildə qoyulub. 1977-ci ilədək komanda “Məhsul”, 1982-ci ilədək “Şəfəq”, 1988-ci ilədək “Kooperator” adı daşıyıb.
Azərbaycanın milli futbol çempionatı 1992-ci ildən keçirilir. O vaxtdan bəri “Qarabağ” 6 dəfə Azərbaycan çempionu olub.
Komanda 2014-2015, 2015-2016, 2016-2017, 2018-2019 mövsümlərində Avropa Liqasının qrup mərhələsində, 2017-2018 mövsümündə Çempionlar Liqasının qrup mərhələsində oynayıb.
1993-cü ildə Ağdam şəhəri işğal olunduqdan sonra komanda köçkün klub kimi fəaliyyət göstərir, hazırda Bakıda məskunlaşıb.
Mayın 11-də başa çatacaq 2018-2019 çempionatında “Qarabağ” 60 xalla birinci pillədə yer alır. Onun ən yaxın izləyicisi – Bakının “Neftçi” komandası 55 xal toplayıb.
“Neftçi” indiyədək 8 dəfə Azərbaycan çempionu olub.
27-ci turda ağdamlılar Bakıda “Səbail”lə, “Neftçi” səfərdə “Qəbələ” ilə qarşılaşacaq. Son turda “Neftçi” və “Qarabağ” özləri üz-üzə gələcək.
Bu mövsüm şəxsi oyunlardakı göstəricilərdə “Neftçi” üstündür. Üç oyunun birində bakılılar 3:1 hesabı ilə qalib gəlib, digər iki görüş isə heç-heçə (1:1) başa çatıb.
Professional Futbol Liqasının təsdiqlədiyi əsasnaməyə görə, sonda xallar eyni olarsa, çempion şəxsi görüşlərin nəticələri əsasında müəyyənləşir.
Digər meyarlar bunlardır: komandaların öz aralarında keçirdikləri oyunlarda top fərqi; mövsüm ərzində ən çox qələbə qazanmış komanda; bütün oyunlarda vurulmuş və buraxılmış topların fərqi; bütün görüşlərdə vurulmuş topların sayı.
Bütün göstəricilər bərabər olsa, ən az qayda pozuntusuna yol vermiş komanda çempionluq qazanır. Sarı kart 1 bal, qırmızı kart 3 baldır.
Qalibi müəyyən etməyə bu da yetməsə, püşk atılır.
