Qarabağ əlili ölkə rəhbərliyinə müraciət edib
Qarabağ müharibəsi əlili Vaqif Alşan oğlu Məmmədov media vasitəsilə ölkə rəhbərliyinə müraciət edib.
1974-cü il təvəllüdlü Vaqif Məmmədov Göyçay rayonunun Şəkili kəndində yaşayır. Qarabağın azadlığı uğrunda gedən döyüşlərdə sağ ayağını itirib, 1-ci qrup əlildir.
Vaqif Məmmədovun Novator.az saytının redaksiyasına daxil olan müraciətində bildirilir ki, ailəlidir, himayəsində dörd övladı var.
Qarabağ əlili vurğulayır ki, sağ ayağının olmaması ona çox əziyyət verir, evinin qəzalı vəziyyətdə olması isə bu əziyyəti daha da artırır: “Çiy kərpicdən tikilmiş evim hazırda aşılanıb qəzalı vəziyyətə düşüb. Birinci mərtəbəsi zirzəmidir, ikinci mərtəbədə yaşayıram. Hər dəfə ikinci mərtəbəyə qalxıb-düşəndə bir ayağım olmadığına görə çox-çox əziyyət çəkirəm.
Evim qəzalı vəziyyətdədir, hər an uça bilər, ciddi təhlükə qarşısındayıq.
Son zamanlar dövlət vəsaiti hesabına Qarabağ müharibəsi əlillərinə pulsuz evlər inşa edilib verilir. Mən buna görə cənab prezidentimiz İlham Əliyevə minnətdarlığımı bildirirəm. Mən də 2012-ci ildən ev növbəsindəyəm. Hazırda növbədə 12-ciyəm.
İstəyim və xahişim odur ki, səhhətimi, evimin qəzalı vəziyyətdə olduğunu nəzərə alıb mənə daha tez müddətdə – bu il ərzində mənzil inşa edib versinlər.
İnanıram ki, prezident cənab İlham Əliyev və birinci vitse-prezident Mehriban xanım Əliyeva mənim bu müraciətimə müsbət cavab verib problemin həllində yaxından köməklik göstərəcəklər. Biz Qarabağ əlillərinin yeganə ümid yeri bu möhtərəm şəxslərdir”.
