Pekin forumu
Aprelin 26-sı Çinin paytaxtı Pekində 2-ci “Bir kəmər, bir yol” beynəlxalq əməkdaşlıq forumu başlayıb. AZƏRTAC xəbər verir ki, foruma Azərbaycan prezidenti İlham Əliyevin rəhbərlik etdiyi nümayəndə heyəti də qatılıb.
37 dövlət və hökumət başçısının iştirak etdiyi, “Bir kəmər, bir yol əməkdaşlığı, ümumi parlaq gələcəyin qurulması” mövzulu forumda 12 panel iclasın və digər tədbirlərin təşkil olunacağı bildirilir.
Açılış mərasimində çıxış edən Çin Xalq Respublikasının sədri Si Cinpin ilk forumdan sonra təşəbbüsü dəstəkləyən ölkələr arasında səmərəli əməkdaşlığın qurulduğunu deyib. Dövlət başçısı “Bir kəmər, bir yol” təşəbbüsünü 150 ölkənin dəstəklədiyini, bu sıraya bir sıra nüfuzlu beynəlxalq təşkilatların da daxil olduğunu diqqətə çatdırıb. O, “Bir kəmər, bir yol” layihəsinin ölkələr arasında ikitərəfli, üçtərəfli və çoxtərəfli əməkdaşlığı da əhatə etdiyini vurğulayıb. Çin lideri təşəbbüsün qədim İpək Yolu üzərində yeni dəyərlərin formalaşmasına da dəstək göstərdiyini, qloballaşmanın iqtisadiyyata mənfi təsirlərini azaltdığını, bu layihənin beynəlxalq səviyyədə yüklərin daşınmasına və milli gəlirlərin artmasına, regional inkişafa ciddi təkan verdiyini qeyd edib.
Forumda Rusiya prezidenti Vladimir Putin, Qazaxıstanın birinci prezidenti Nursultan Nazarbayev, Misir prezidenti Əbdülfəttah əl-Sisi, Malayziyanın baş naziri Mahathir Məhəmməd, Pakistanın baş naziri İmran Xan, BMT-nin baş katibi Antonio Quterreş “Bir kəmər, bir yol” təşəbbüsünün əhəmiyyətindən danışıblar. Onlar bəşəriyyəti narahat edən məsələlərə diqqət çəkiblər, problemlərin həllində və dünya iqtisadiyyatının dinamik inkişafında bu layihənin böyük rol oynadığını vurğulayıblar.
