Müsavatçı fəalın cəzası dəyişmədi
Bakı Apellyasiya Məhkəməsi Müsavat Gənclər Təşkilatının sədri Əbülfəz Sadıqbəylinin şikayətinə baxışı başa çatdırıb.
Əbülfəz Sadıqbəyli 2018-ci ilin noyabrında həbs edilib. Partiya fəalı dələduzluq və saxta sənəd hazırlayıb ondan istifadə etməkdə ittiham olunub. Rəsmi ittihama əsasən, Əbülfəz Sadıqbəyli yol polisinə “Nikoyl” bankının krediti ilə aldığı “Niva” markalı avtomobilə görə borclu qaldığı pulun ödənməsi barədə Qaradağ filialından saxta arayış təqdim edərək maşını öz mülkiyyətinə keçirib, daha sonra satıb.
Bu il martın 6-da Qaradağ Rayon Məhkəməsi Əbülfəz Sadıqbəyliyə 1 il 6 ay müddətinə azadlığın məhdudlaşdırılması cəzası kəsib, o, məhkəmə zalından azadlığa buraxılıb.
Bəraət istəyən gənc fəal apellyasiya instansiyasına üz tutub.
“Amerikanın səsi” xəbər verir ki, aprelin 25-də Bakı Apellyasiya Məhkəməsi Əbülfəz Sadıqbəylinin bu istəyini təmin etməyib, əvvəlki hökmü qüvvədə saxlayıb.
Əbülfəz Sadıqbəyli qərardan kassasiya şikayəti vermək niyyətindədir.
Novator.az bildirir ki, azadlığın məhdudlaşdırılması cəzası məhkumun cəmiyyətdən tam təcrid olunmadan yaşayış yeri üzrə nəzarət altında saxlanmasından ibarətdir. Məhkəmə azadlığın məhdudlaşdırılması cəzası təyin edilmiş məhkumun yaşayış yerini (tamamilə və ya günün müəyyən vaxtlarında) və müəyyən ərazi hüdudlarını tərk etməsinə məhdudiyyət qoyur. Azadlığın məhdudlaşdırılması cəzasına məhkum edilmiş şəxs bu vəzifələri yerinə yetirməlidir: yaşayış yerini tamamilə və ya günün müəyyən vaxtlarında tərk etməmək; elektron nəzarət vasitəsini gəzdirmək və həmin vasitənin işlək vəziyyətdə saxlanması üçün ona xidmət etmək; məhkəmənin müəyyən etdiyi ərazi hüdudlarını tərk etməmək; müvafiq məhkəmə qərarı olmadan yaşayış yerini dəyişdirməmək, habelə cəzanın icrasına nəzarət edən orqanı iş və ya təhsil yerinin dəyişdirilməsi barədə əvvəlcədən məlumatlandırmaq.
Məhkəmə məhkum üçün bu əlavə vəzifələr müəyyən edə bilər: kütləvi və digər tədbirlər təşkil etməmək və ya belə tədbirlərdə iştirak etməmək; məhkəmənin müəyyən etdiyi ərazi hüdudları daxilində müəyyən yerlərə getməmək; alkoqolizmdən, narkomaniyadan, toksikomaniyadan və ya zöhrəvi xəstəliklərdən müalicə kursu keçmək; məhkumun islah olunmasına kömək edən digər vəzifələr.
