Manatı qorumağa 1,9 milyard dollar gedib
Dövlət Neft Fondu Mərkəzi Bankın bu il keçirdiyi valyuta hərraclarına 1,9 milyard dollar məbləğində vəsait çıxarıb. Aprelin 26-da mətbuat konfransı keçirən Mərkəzi Bankın İdarə Heyətinin sədri Elman Rüstəmov belə deyib. O qeyd edib ki, tələb təklifdən 100 milyon dollar çox olub.
Mərkəzi Bank ilin əvvəlindən bəri 30 valyuta hərracı keçirib.
Novator.az bildirir ki, Dövlət Neft Fondu Mərkəzi Bankın mart ayında keçirdiyi valyuta hərraclarında nə qədər valyuta satdığını hələ açıqlamayıb.
Yanvarın valyuta hərraclarında fonddan 634,9 milyon dollar, fevralın valyuta hərraclarında 316,2 milyon ABŞ dolları məbləğində vəsait alınıb. Manatın kursunu qorumaq üçün keçirilən hərraclarda iki ayın ümumi xərci 951,1 milyon dollar olub.
2016-cı ildə Dövlət Neft Fondunun analoji xərci 4,9 milyard dollar, 2017-ci ildə 3,6 milyard dollar, 2018-ci ildə 6,5 milyard dollar göstərilib.
Mərkəzi Bank ABŞ dollarının kursunu 2018-ci il martın 7-dən 1,7 manat həddində saxlayır.
