Hərbi obyektlərə reyd
Müdafiə naziri general-polkovnik Zakir Həsənov cəbhə zonasında tikilməkdə olan bir neçə hərbi hissəyə baş çəkib. Mod.gov.az-ın 26 aprel məlumatına görə, nazirə məruzə edilib ki, ilin sonunadək istifadəyə veriləcək 10-a yaxın hərbi şəhərcikdə su, qaz, istilik və digər kommunikasiya sistemləri ilə təmin olunan qərargahlar, əsgər yataqxanaları, yeməkxanalar, döyüş texnikası üçün saxlanclar, digər inzibati bina və qurğularla yanaşı məişət və ictimai iaşə obyektləri, o cümlədən qazanxana, camaşırxana və hamamxana kompleksləri, tibb məntəqələri və digər infrastruktur obyektləri nəzərdə tutulub.
Zakir Həsənov yeni inşa edilən artilleriya hərbi hissəsi, hərbi hospitalda və digər hərbi obyektlərdə aparılan tikinti işlərinin gedişatını yoxladıqdan sonra inşaat işlərinin keyfiyyətli aparılması ilə əlaqədar tapşırıq və tövsiyələr verib.
