Azərbaycanlı əsir Yerevanda əməliyyat olunub
Ermənistana əsir düşən Azərbaycan vətəndaşı Elvin Arif oğlu İbrahimov aprelin 24-ü Yerevandakı “Erebuni” Tibb Mərkəzində əməliyyat olunub.
Novator.az-ın məlumatına görə, Ermənistan mediası Elvin İbrahimovun mədəsindən yad predmetin kənar edildiyini bildirir.
Əməliyyatın Ermənistanın Ədliyyə Nazirliyi və Beynəlxalq Qırmızı Xaç Komitəsinin Yerevan ofisi ilə razılaşdırmaqla həyata keçirildiyi vurğulanır.
Qazax rayonunun Yuxarı Salahlı kəndinin 1986-cı il təvəllüdlü sakini Elvin İbrahimov bu il martın 16-na keçən gecə Ermənistanın Noyemberyan rayonu ilə sərhəd xəttində yolu azaraq qarşı tərəfə keçib. Ermənistan sərhədçilərinin ayağından yaraladığı Elvin İbrahimova dövlət sərhədini qanunsuz keçmək ittihamı ilə cinayət işi qaldırılıb.
Azərbaycanın Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası Elvin İbrahimovun ruhi xəstəxanada qeydiyyatda olduğunu bəyan edib.
