5 ildə Krıma 65 mindən çox rusiyalı köçürülüb
Rusiyanın işğalı altında olan Ukrayna ərazisi Krımın əhali göstəriciləri açıqlanıb. Novator.az bildirir ki, yerli statistika qurumunun hesabatına görə, 2019-cu ilin yanvarın 1-nə Krım Respublikası adlanan bölgənin əhalisi 1,9 milyon nəfər olub.
Sevastopol şəhərində həmin müddətə 443 min 200 nəfərin yaşadığı bildirilir.
Özünü Krım Respublikasının Daxili İşlər Nazirliyi sayan qurum 2014-cü ildən bəri Krıma 65 min 134 rusiyalının köçdüyünü qeyd edir.
Bölgədə müvəqqəti yaşayan əcnəbilərin sayı 15 min nəfər, yaşamaq icazəsi olanların sayı 18 min nəfər göstərilir.
Ukraynanı çıxmaqla Krıma ən çox Özbəkistan, Belarus, Qazaxıstan, Tacikistan və Ermənistan vətəndaşlarının gəldiyi vurğulanır.
Rusiya Ukraynanın Krım Muxtar Respublikasını və Sevastopol şəhərini 2014-cü ildə işğal edərək özünə birləşdirib, Donbas bölgəsində – Donetsk və Luqansk vilayətlərinin bir hissəsində isə iki işğalçı rejim qurub. Bu separatçı rejimlər özlərini müstəqil dövlət sayır.
1873-cü ildə Rusiyanın işğalı altına düşən, 1954-cü ildə Ukraynaya verilən Krım qədim türk torpağıdır. Tarixi mənbələrə əsasən, 18-ci əsrin birinci yarısında Krım əhalisinin 95,1 faizi, ikinci yarısında isə 92,6 faizi tatarlar olub. Sonrakı illərdə keçirilmiş siyahıyaalmalarda Krımda tatarların azaldıldığı üzə çıxıb. 1795-ci ildə tatarların Krımda xüsusi çəkisi 87,6%-ə, 1816-cı ildə 85,9%-ə, 1850-ci ildə 77,8%-ə, 1897-ci ildə 35,6%-ə, 1920-ci ildə 26%-ə, 1939-cu ildə 19,4%-ə düşüb.
Krım türkləri 1944-cü ildə tam deportasiya ediliblər. Onların tarixi vətənlərinə qayıdışı 1987-ci ildən başlayıb. Rusiya 2014-cü ildə Krımı işğal edən zaman 2 milyona yaxın əhalinin 12,1 faizini tatarlar təşkil edib.
Səidə Hüseynova
