Rusiyanın təcavüz aktı müzakirəyə çıxarılır
Aprelin 25-də BMT Təhlükəsizlik Şurası Ukraynanın Donbas bölgəsi ilə bağlı iclas keçirəcək. Novator.az-ın məlumatına görə, Ukraynanın tələbi ilə çağırılan fövqəladə iclas Bakı vaxtı ilə saat 23-də başlamalıdır.
Hazırda BMT Təhlükəsizlik Şurasına Almaniya sədrlik edir.
Rusiya 2014-cü ildə Ukraynanın Krım bölgəsini işğal edərək özünə birləşdirib, Donbas bölgəsində – Donetsk və Luqansk vilayətlərinin bir hissəsində isə iki işğalçı rejim qurub. Bu separatçı rejimlər özlərini müstəqil dövlət sayır.
Donbas bölgəsində 2014-cü ildən davam edən silahlı münaqişədə 10 mindən çox adam həlak olub.
Aprelin 24-də Rusiya prezidenti Vladimir Putin Donetsk və Luqansk vilayətlərinin işğaldakı hissəsində daimi yaşayan şəxslərə vətəndaşlıq verilməsini sadələşdirən fərman imzalayıb. Fərmana əsasən, separatçı rejimlərin sakinlərinin Rusiya vətəndaşlığına qəbulu üçün müraciətinə maksimum üç ay müddətində baxılmalıdır.
BMT Təhlükəsizlik Şurası bu məsələyə qiymət vermək üçün toplanır. Ukrayna hesab edir ki, Rusiyanın pasport addımı BMT nizamnaməsinə və Donbas probleminin dinc həlli ilə bağlı razılaşmalara ziddir. Dövlət başçısı Pyotr Poroşenko və yeni seçilmiş prezident Vladimir Zelenski 24 aprel fərmanını təcavüz aktı adlandıraraq dünya birliyini Rusiyaya sanksiyaları gücləndirməyə çağırıblar.
ABŞ Dövlət Departamentinin bəyanatında pasport fərmanı Ukraynanın ərazi bütövlüyünə və suverenliyinə hücumları artıran böyük təxribat kimi qiymətləndirilib.
