Mehmanxana biznesinin gəlirləri 2,5 faiz azalıb
Dövlət Statistika Komitəsi mehmanxana və həmin tipli müəssisələrin fəaliyyəti haqqında hesabat yayıb. Novator.az bildirir ki, hesabata görə, 2019-cu ilin yanvar-mart aylarında Azərbaycanın mehmanxanalarında 545,4 min gecələmə keçirilib, bu da əvvəlki ilin birinci rübü ilə müqayisədə 6,9 faiz azdır.
Gecələmələrin 61,7 faizi Bakıda, 7,8 faizi Qəbələdə, 7,5 faizi Qusarda, 4,3 faizi Naftalanda, 4,1 faizi Naxçıvan Muxtar Respublikasında, 3,2 faizi Qubada, hər birində 1,3 faiz olmaqla Qax və Mingəçevirdə və 0,9 faiz olmaqla Lənkəran və Gəncədə, 0,8 faizi Şamaxıda, 0,7 faizi Tovuzda, 0,3 faizi Xaçmazda, 5,2 faizi digər bölgələrdəki mehmanxanalarda qeydə alınıb.
Əcnəbilər və vətəndaşlığı olmayan şəxslərin keçirdiyi gecələmələrin sayı əvvəlki ilin yanvar-mart aylarına nisbətən 14,1 faiz azalıb.
Gecələmələrin 15,1 faizi Birləşmiş Ərəb Əmirlikləri, 13,1 faizi Rusiya, 7,1 faizi İran, 6,1 faizi Türkiyə, 5,9 faizi Hindistan, 5,5 faizi Səudiyyə Ərəbistanı, 3,9 faizi Küveyt, 2,9 faizi Böyük Britaniya, 2,6 faizi Pakistan, 2,3 faizi Qətər, 2,1 faizi İsrail, 2 faizi İraq, 1,9 faizi ABŞ, 1,7 faizi Qazaxıstan, 1,3 faizi Oman, 1,1 faizi Ukrayna, 0,9 faizi Almaniya, 0,7 faizi Bəhreyn, 23,8 faizi digər ölkələrin vətəndaşlarının payına düşüb.
Yanvar-mart aylarında mehmanxanaların gəlirləri əvvəlki ilin eyni dövrü ilə müqayisədə 2,5 faiz az və ya 71,3 milyon manat olub.
Novator.az xatırladır ki, rəsmi statistikaya əsasən, 2019-cu ilin yanvar-mart aylarında Azərbaycana 157 ölkədən 610,8 min və ya ötən ilin ilk rübü ilə müqayisədə 2,9 faiz az əcnəbi və vətəndaşlığı olmayan şəxs gəlib.
2017-ci ildə Azərbaycana gələn turistlərin sayı 19,9 faiz, 2018-ci ildə 5,7 faiz artmışdı.
