Zelenski 13,5 milyon səs toplayıb
Ukraynanın Mərkəzi Seçki Komissiyası prezident seçkisinin ikinci turu ilə bağlı yeni rəqəmlər açıqlayıb. Novator.az-ın məlumatına görə, aprelin 21-də keçirilmiş səsverməyə 18 milyon 491 min 837 nəfərin qatıldığı bildirilir.
İlkin nəticələrə əsasən, şoumen Vladimir Zelenskiyə 13 milyon 541 min 528 nəfər dəstək verib. Prezident Pyotr Poroşenko 4 milyon 522 min 320 səs toplayıb.
Vladimir Zelenski 1978-ci il yanvarın 25-də Krivoy Roq şəhərində doğulub. İngilis dili təmayüllü gimnaziyada təhsil alıb.
Orta məktəbdə dərnək tamaşalarında fəal iştirakı, yerli ansamblda gitara çalması ilə fərqlənib, orada şən və hazırcavablar klubu yaradıb, şəhərin analoji klubunda çıxış edib.
Vladimir Zelenski Krivoy Roq İqtisadiyyat İnstitutunu hüquqşünas diplomu ilə bitirib.
1997-ci ildə “95-ci kvartal” şən və hazırcavablar komandası yaradaraq onun kapitanı olub.
2003-cü ildən Ukraynanın “1+1” telekanalı ilə əməkdaşlıq edib, kulinar şounun aparıcısı kimi ad çıxarıb.
Vladimir Zelenski 2005-ci ildən “İnter” telekanalında axşam şousuna müəlliflik edib, məşhurlaşaraq müxtəlif tamaşalarda, filmlərdə rollar alıb.
Prezident seçkisinə Vladimir Zelenski Xalq Xidmətçisi Partiyasının namizədi kimi qatılıb.
