Hakimiyyətdən getməmək layihəsi baş tutdu
Misirdə aprelin 20-22-də keçirilmiş konstitusiyaya dəyişikliklər referendumunun ilkin nəticələri açıqlanıb. Novator.az-ın məlumatına görə, üç gün davam etmiş referenduma seçicilərin 44,3 faizinin qatıldığı, onların 88,3 faizinin ana qanunda redaktələrə tərəfdar çıxdığı bəyan olunub.
Konstitusiyada əsas yenilik prezidentlik müddətinin 4 ildən 6 ilə artırılmasıdır. Dəyişikliyə görə, indiki prezident Əbdülfəttah əl-Sisinin səlahiyyət müddəti 2024-cü ilə qədər uzadılacaq və onun daha bir dəfə seçilmək hüququ olacaq.
Prezidentə hakimlərin və prokurorların təyinatı ilə yeni səlahiyyətlərin verilməsi də nəzərdə tutulur.
Digər dəyişikliklə parlamentin yuxarı palatası – 180 yerlik Senat yaradılmalıdır.
Əbdülfəttah əl-Sisi 1954-cü ildə doğulub. Qahirə Hərbi Akademiyasını bitirib. 2013-cü ildə müdafiə naziri və ordu komandanı olarkən prezident Məhəmməd Mursini devirib, 2014-cü ilin mayında dövlət başçısı seçilib və 2018-ci ilin martında keçirilən seçkidə postunu əlində saxlayıb.
