Yayım Şurasına üzvlər seçilib
Milli Məclisin 23 aprel iclasında İctimai Televiziya və Radio Yayımları Şirkətinin Yayım Şurasının üç üzvü seçilib. 6 il müddətinə seçilən şəxslər bunlardır: Yusif Babanlı (namizədliyini idman federasiyaları irəli sürüb); Salman Musayev (namizədliyini dini konfessiyalar irəli sürüb); Zemfira Qafarova (namizədliyini yaradıcılıq təşkilatları irəli sürüb).
Novator.az bildirir ki, 9 üzvü olan Yayım Şurası proqramların yayımı zamanı qanunvericiliyin tələblərinə əməl edilməsi üzərində nəzarəti həyata keçirir. Şuranın İctimai Televiziya və Radio Yayımları Şirkətinin baş direktorunu seçmək, baş direktorun təqdimatı ilə onun müavinlərini vəzifəyə təyin və ya vəzifədən azad etmək, vəzifə təlimatları və daxili tənzimləyici normalar hazırlayıb qəbul etmək səlahiyyətləri var.
Yayım Şurasının üzvləri bu qurumların irəli sürdüyü namizədlər arasından seçilir: Azərbaycan Həmkarlar İttifaqları Konfederasiyası; Milli Elmlər Akademiyası; Mətbuat Şurası; Sahibkarlar Şurası; gənclər təşkilatları; qadın cəmiyyətləri; idman federasiyaları; dini konfessiyalar; yaradıcılıq təşkilatları. Namizədlər Milli Məclisdə təsdiqlənir.
2017-ci ildən Yayım Şurasına akademik Muxtar İmanov sədrlik edir. 1955-ci il təvəllüdlü Muxtar İmanov Milli Elmlər Akademiyasının Folklor İnstitutunun direktorudur.
