“Real TV” ümumrespublika kanalına çevrildi
“Real TV”yə yerüstü yayım üçün müddətsiz lisenziya verilib.
Qərar Milli Televiziya və Radio Şurasının aprelin 23-də keçirilən iclasında qəbul edilib.
Beləliklə, “Real TV” ümumrespublika kanalına çevrilib.
“Real TV” xəbər kanalıdır. 2018-ci il martın 5-dən peyklə yayılır. Kanala telejurnalist Mirşahin Ağayev rəhbərlik edir. Onun komandasında 2016-cı ilin yayından fəaliyyəti dayandırılmış ANS telekanalının bir sıra əməkdaşları da çalışır.
Milli Tеlеviziya və Radiо Şurası yeni ümumrespublika xəbər kanalının açılması ilə bağlı müsabiqəni 2019-cu il martın 11-də elan etmişdi. Müsabiqədə “Real Təhlil İnformasiya Mərkəzi” MMC-dən (“Real TV”) başqa “TV Media Azərbaycan” MMC və və RTV MMC də iştirak edirdi.
“Real TV”nin ofisi Bakı şəhərində yerləşir.
Hazırda bütün ölkədə yayılan 10 televiziya var: AzTV, “Mədəniyyət”, “İdman Azərbaycan”, İctimai Televiziya, ATV, “Space”, “Xəzər”, “Lider”, ARB, “CBC Sport”.
Milli Televiziya və Radio Şurası 2002-ci ildə televiziya və radio yayımı sahəsində dövlət siyasətinin həyata keçirilməsini təmin etmək və bu fəaliyyəti tənzimləmək məqsədilə yaradılıb.
Şura dövlət büdcəsindən maliyyələşdirilir. Onun 9 üzvü var. Üzvləri prezident təyin edir.
Qurumun sədri postunu Nuşirəvan Məhərrəmli tutur.
