Naxçıvan birinci rübdə
Naxçıvan Muxtar Respublikasının Dövlət Statistika Komitəsi üç aylıq göstəriciləri açıqlayıb. Novator.az bildirir ki, rəsmi hesabata görə, 2019-cu ilin yanvar-mart aylarında muxtar respublikada 535,9 milyon manatlıq ümumi daxili məhsul istehsal olunub: “Adambaşına ümumi daxili məhsul əvvəlki ilin birinci rübünə nisbətən 1,5 faiz artaraq 1174 manata çatıb. Ümumi daxili məhsulun tərkibində ilk yeri 31,4 faizlik payla sənaye sahəsi tutub.
Üç ayda sənaye məhsulu 1,2 faiz, kənd təsərrüfatı məhsulu 2,4 faiz, nəqliyyat sektorunda yük daşınması 2,3 faiz, informasiya və rabitə xidmətləri 3,3 faiz artıb.
Birinci rübdə muxtar respublikada 1173 yeni iş yeri yaradılıb, bunun da 1162-si daimi iş yerləridir.
Muxtar respublikanın xarici ticarət dövriyyəsi 65,9 milyon ABŞ dolları təşkil edib. Bunun 53,4 milyon dolları ixrac, 12,5 milyon dolları idxaldır”.
2019-cu il martın 1-nə orta aylıq əməkhaqqının məbləği 433,2 manat göstərilir.
