Zelenskiyə qədər
Ukraynada aprelin 21-də keçirilmiş prezident seçkisinin – ikinci turun qalibi olan Vladimir Zelenski ölkənin yeddinci dövlət başçısıdır. Vladimir Zelenskiyə qədər 5 nəfər prezident seçilib, 1 nəfər isə prezident səlahiyyətlərini müvəqqəti icra edib.
Novator.az bildirir ki, 1991-ci il avqustun 24-də müstəqilliyini elan edən zaman Ukraynada dövlət başçısı postunu 1934-cü il təvəllüdlü parlament sədri Leonid Kravçuk tutub. O, 1990-cı il iyulun 23-dən Ali Sovetin, 1991-ci il avqustun 24-dən Ali Radanın sədri olub.
1991-ci il dekabrın 1-də Leonid Kravçuk ümumxalq seçkisində Ukrayna prezidenti seçilib, dekabrın 5-də səlahiyyətlərinin icrasına başlayıb.
1994-cü ildə növbədənkənar prezident seçkisi keçirilib. İyulun 10-da – ikinci turda Leonid Kravçuk 1938-ci il təvəllüdlü Leonid Kuçmaya məğlub olub. İyulun 19-da səlahiyyətlərinin icrasına başlayan Leonid Kuçma 1999-cu ildə prezident seçkisinin ikinci turunda (14 noyabr) postunu əlində saxlayıb.
2004-cü ilin prezident seçkisi üç mərhələdən ibarət olub. İkinci turun dekabrın 26-da keçirilmiş təkrar səsverməsində 1954-cü il təvəllüdlü Viktor Yuşşenko prezident seçilib, 2005-ci il yanvarın 23-də səlahiyyətlərinin icrasına başlayıb.
2010-cu ilin prezident seçkisində – fevralın 7-də keçirilmiş ikinci turda 1950-ci il təvəllüdlü Viktor Yanukoviç dövlət başçısı seçilib, fevralın 25-də səlahiyyətlərinin icrasına başlayıb.
2014-cü il fevralın 22-də Viktor Yanukoviç parlamentin qərarı ilə prezident vəzifəsindən uzaqlaşdırılıb, dövlət başçısı səlahiyyətləri 1964-cü il təvəllüdlü parlament sədri Aleksandr Turçinova ötürülüb.
2014-cü il mayın 25-də keçirilmiş növbədənkənar seçkidə 1965-ci il təvəllüdlü Pyotr Poroşenko prezident seçilib, iyunun 7-də səlahiyyətlərinin icrasına başlayıb.
2019-cu il aprelin 21-də – prezident seçkisinin ikinci turunda Pyotr Poroşenko 1978-ci il təvəllüdlü Vladimir Zelenskiyə uduzub.
Krivoy Roq İqtisadiyyat İnstitutunu hüquqşünas diplomu ilə bitirən Vladimir Zelenski şoumen və aktyor kimi tanınıb. O, prezident seçkisinə Xalq Xidmətçisi Partiyasının namizədi kimi qatılıb.
