Qırıcı təyyarələrin təlim-məşq mərkəzi açılıb
Müdafiə naziri general-polkovnik Zakir Həsənov aprelin 18-də Aviasiya Təmiri Zavoduna baş çəkib. Mod.gov.az-ın məlumatına görə, nazirə təyyarə və helikopter aqreqatlarının, mühərrik və reduktorlarının, aviasiya texnika və avadanlığının, eləcə də radioelektron avadanlıq və aviasiya silahlarının təmiri sexlərində fəaliyyətlər barədə məruzə olunub. Nazir aviasiya vasitələrinin hazırlığı, aqreqatların cari təmiri və reqlament işlərinin gedişi ilə maraqlanıb.
Sonra nazir Hərbi Hava Qüvvələrinin MiQ-29 qırıcı təyyarələrinin təlim-məşq mərkəzinin açılışında iştirak edib. Zakir Həsənov mərkəzin aviasiya mühəndisləri, aviasiya silahları, uçuşların idarə olunması və təhlili siniflərində olub, hərbi pilotların hazırlıq məşqlərini izləyib və müvafiq tapşırılar verib. Məruzə olunub ki, burada quraşdırılmış simulyasiya qurğuları eyni vaxtda iki və ya dörd təyyarənin uçuşunu təmin etməyə imkan verir.
Müdafiə nazirinə uçuş heyəti üçün nəzərdə tutulan yüksəklik ləvazimatları və avadanlıqları nümayiş etdirilib.
Mərkəzdə yaradılan şəraitlə tanış olduqdan sonra nazir hərbi pilotlarla müşavirə keçirib və onların qarşısında konkret tapşırıqlar qoyub.
