Büdcə necə icra olunub?
Maliyyə Nazirliyi dövlət büdcəsinin 2019-cu ilin birinci rübündə necə icra olunduğunu açıqlayıb. Hesabata görə, yanvar-mart aylarında büdcənin mədaxili 5 milyard 439,7 milyon manat, xərcləri 5 milyard 35,9 milyon manat olub, 403,8 milyon manat məbləğində artıqlıq yaranıb.
Gəlirlər 99,1 faiz icra edilib. Vergilər Nazirliyi dövlət büdcəsinə 1 milyard 672,9 milyon manat vəsait verib, bu da 2018-ci ilin eyni dövrü ilə müqayisədə 16,5 faiz çoxdur.
Dövlət Gömrük Komitəsindən büdcəyə 1 milyard 14,1 milyon manat vəsait təmin edilib (ötən ilin eyni dövrü ilə müqayisədə 39,5 faiz çox).
Dövlət büdcəsindən maliyyələşdirilən təşkilatların ödənişli xidmətlərindən daxilolmalar 93,8 milyon manat, digər daxilolmalar 43,9 milyon manat göstərilir.
Dövlət Neft Fondundan büdcəyə 2 milyard 615 milyon manat vəsait köçürülüb.
Xərclər proqnoza nisbətən 100,4 faiz icra edilib. Dövlət büdcəsi xərclərinin 41,8 faizi sosial xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilib.
