BDU-nun nizamnaməsi
Nazirlər Kabineti Bakı Dövlət Universitetinin nizamnaməsini təsdiqləyib. Novator.az bildirir ki, sənədə görə, universitet ali təhsil, habelə orta ixtisas və əlavə təhsil proqramlarını həyata keçirən, fundamental, nəzəri- metodoloji, pedaqoji-metodiki və tətbiqi elmi-tədqiqatlar aparan publik hüquqi şəxsdir.
Universitetin ali idarəetmə orqanı Elmi Şuradır.
Strateji inkişaf məsələləri üzrə idarəetmə orqanı ictimai əsaslarla fəaliyyət göstərən Himayəçilər Şurasıdır. Himayəçilər Şurasının tərkibini azı 3 nəfər olmaqla Təhsil Nazirliyi təsdiq edir.
Tədris-metodiki işləri Elmi-Metodiki Şura həyata keçirir.
Təhsil ocağının cari fəaliyyətinə rektor rəhbərlik edir. O, universitetin işçilərinin (prorektor istisna olmaqla) vəzifəyə təyin və vəzifədən azad edilməsinə dair qərarlar qəbul edir.
Rektorun təyinatı prezidentin səlahiyyətindədir.
Prorektorları universitetin təqdimatı əsasında Təhsil Nazirliyi təyin edir.
Bakı Dövlət Universiteti 1919-cu ildə yaradılıb. Bu il martın 11-dən universitetə Elçin Babayev rektorluq edir.
Elçin Babayev 1965-ci ildə Naxçıvan şəhərində doğulub. Bakı Dövlət Universitetini bitirib. Fizika-riyaziyyat elmləri üzrə fəlsəfə doktoru, dosentdir. Astrofizika, radioastronomiya üzrə mütəxəssisdir. Yüzdən çox elmi əsərin müəllifidir.
Rektor təyin olunana qədər Prezident yanında Elmin İnkişafı Fondunun icraçı direktoru postunu tutub.
