4,8 milyon məşğul, 39,4 min işsiz…
Aprelin 1-nə iqtisadi fəal əhalinin sayı 5 milyon 131,7 min nəfər olub, onların 4 milyon 877,6 min nəfərini məşğul əhali təşkil edib. Novator.az-ın məlumatına görə, Dövlət Statistika Xidmətinin hesabatında rəsmi qeydiyyata alınmış işsizlərin sayı 39,4 min nəfər, işsizlikdən sığorta ödənişinin orta məbləği 239,5 manat göstərilir.
Hesabata əsasən, 2019-cu ilin yanvar-mart aylarında Azərbaycanın iqtisadi və sosial sahələrinə 2 milyard 699,7 milyon manat sərmayə yönəldilib. Bu vəsaitin 49 faizi sənaye, 21,5 faizi tikinti, 15,3 faizi nəqliyyat və anbar təsərrüfatı, 3,2 faizi kənd təsərrüfatı, meşə təsərrüfatı və balıqçılıq, 2,4 faizi dövlət idarəetməsi və müdafiə; sosial təminat, 1,9 faizi təhsil, 1,8 faizi informasiya və rabitə, 1,2 faizi turistlərin yerləşdirilməsi və ictimai iaşə sahəsində fəaliyyət sahələrinə sərf edilib.
Xarici müəssisə və təşkilatlar 882,7 milyon manat sərmayə qoyub, bunun 90,8 faizi Böyük Britaniya, Türkiyə, İsveçrə, ABŞ, Malayziya, Yaponiya, Çexiya, İran, Rusiya və Norveç sərmayədarlarına məxsus olub.
Başqa bir hesabata görə, yanvar-mart aylarında ictimai iaşə dövriyyəsi 2018-ci ilin müvafiq dövrü ilə müqayisədə real ifadədə 3,4 faiz, əhaliyə göstərilən ödənişli xidmətlərin dəyəri real ifadədə 0,8 faiz artıb.
