Üç aylıq alış-veriş statistikası
Dövlət Gömrük Komitəsi 2019-cu ilin birinci rübünün hesabatını açıqlayıb. Novator.az bildirir ki, rəsmi məlumata görə, yanvar-mart aylarında Azərbaycanın xarici ticarət əməliyyatlarının həcmi 7,6 milyard dollar olub. Bunun 4,5 milyard dolları ixrac, 3,1 milyard dolları idxaldır.
Üç ayda 155 ölkə ilə ticarət əməliyyatı aparılıb, gömrük orqanları büdcəyə 1 milyard 14 milyon manat ödəyib.
İxracın 78,8 faizi xam neft və xam neft məhsulları, 2,2 faizi neft məhsulları, 9,5 faizi təbii qaz, 2,3 faizi meyvə-tərəvəz, 1 faizi plastmassa və ondan hazırlanan məmulatlardır.
İdxalın 18,1 faizi maşın, mexanizm, elektrik aparatları, avadanlıqlar və onların hissələri, 12,4 faizi yeyinti məhsulları, 6,6 faizi nəqliyyat vasitələri və onların hissələri, 6,8 faizi qara metallar və onlardan hazırlanan məmulatlar, 2,6 faizi plastmassa və ondan hazırlanan məmulatlar, 1,8 faizi oduncaq və ondan hazırlanan məmulatlar, 1,8 faizi əczaçılıq məhsulları, 1,8 faizi geyim əşyaları və geyim üçün ləvazimat kimi rəsmiləşib.
Yanvar-mart aylarında ixracın 4,2 faizi MDB ölkələrinin, 58,5 faizi Avropa İttifaqı ölkələrinin, 37,3 faizi digər ölkələrin payına düşüb.
İdxalda MDB-nin payı 21,8 faiz, Avropa İttifaqının payı 15,8 faiz, digər ölkələrin payı 62,4 faiz göstərilir.
Əsas tərəfdaş İtaliya olub. Bu ölkə ilə ticarət üç aylıq dövriyyənin 19,4 faizi həcmində rəsmiləşib. Türkiyə 10,6 faizlə ikinci, Rusiya 7,4 faizlə üçüncüdür.
İxracda əsas ölkə İtaliya (31,2 faiz), idxalda Rusiyadır (13,9 faiz).
