Turistlərin sayı 2,9 faiz azalıb
2019-cu ilin yanvar-mart aylarında Azərbaycana 157 ölkədən 610,8 min və ya ötən ilin ilk rübü ilə müqayisədə 2,9 faiz az əcnəbi və vətəndaşlığı olmayan şəxs gəlib. Novator.az-ın məlumatına görə, Dövlət Statistika Komitəsi Sərhəd Xidmətinə istinadla belə hesabat yayıb.
Gələnlərin 28 faizinin Gürcüstan, 27,4 faizinin Rusiya, 11,3 faizinin Türkiyə, 9,2 faizinin İran, 3,5 faizinin Birləşmiş Ərəb Əmirlikləri, 1,8 faizinin Ukrayna, 1,7 faizinin Hindistan, 1,4 faizinin İraq, 15,6 faizinin digər ölkələrin vətəndaşları olduğu bildirilir.
Üç ayda xarici ölkələrə gedən Azərbaycan vətəndaşlarının sayı əvvəlki ilin müvafiq dövrü ilə müqayisədə 28,9 faiz artaraq 1 milyon 215,7 min nəfərə çatıb. İrana gedən Azərbaycan vətəndaşlarının sayı 84,2 faiz, Gürcüstana gedənlərin sayı 12,7 faiz, Rusiyaya gedənlərin sayı 7,4 faiz, Türkiyəyə gedənlərin sayı isə 3 faiz artıb.
Novator.az xatırladır ki, rəsmi statistikaya əsasən, 2017-ci ildə Azərbaycana gələn turistlərin sayı 19,9 faiz, 2018-ci ildə 5,7 faiz artmışdı.
