Satınalmalar: vahid internet portalı necə işləyəcək?
Prezident İlham Əliyev dövlət satınalmalarının vahid internet portalı haqqında əsasnaməni təsdiqləyib. Novator.az-ın məlumatına görə, aprelin 16-da imzalanan fərmanla Antiinhisar və İstehlak Bazarına Nəzarət Dövlət Agentliyinə Vətəndaşlara Xidmət və Sosial İnnovasiyalar üzrə Dövlət Agentliyi ilə birgə portalın fəaliyyətinin təşkili, saxlanması və ondan səmərəli istifadənin təmin edilməsi üçün zəruri tədbirlər görmək; portalın saxlanması xərclərinin dövlət büdcəsinin vəsaiti hesabına və dövlət-özəl tərəfdaşlığı prinsipinə uyğun olaraq maliyyələşdirilməsi barədə təkliflərini bir ay müddətində prezidentinə təqdim etmək; Xüsusi Dövlət Mühafizə Xidməti ilə birlikdə portalın təhlükəsizliyinin təmin edilməsi üçün iş aparmaq tapşırılıb.
Vətəndaşlara Xidmət və Sosial İnnovasiyalar üzrə Dövlət Agentliyi portalın “Elektron hökumət” İnformasiya Sisteminə inteqrasiyası ilə məşğul olmalıdır.
Dövlət satınalmalarının vahid internet portalı tender elanının dərc edilməsini; tenderdə iştirak etmək üçün malgöndərənin (podratçının) sənədləri satınalan təşkilata təqdim etməsini; tenderdə iştirak haqqının ödənməsini; malgöndərənin (podratçının) iddiaçı kimi qeydiyyatdan keçməsini; iddiaçı kimi qeydiyyatdan keçmiş hər bir malgöndərən (podratçı) üçün elektron kabinetin yaradılmasını; satınalan təşkilat ilə malgöndərən (podratçı) arasında qarşılıqlı məlumat mübadiləsini və sənədlərin təqdim olunmasını; tender təkliflərinin təqdim olunmasını; tender təklifinin təminatının verilməsini; tender komissiyasının virtual iclaslarının keçirilməsini; tender təkliflərinə baxılmasını, onların qiymətləndirilməsini və müqayisəsini; satınalma müqaviləsinin elektron qaydada bağlanmasını, həmin müqavilənin və tenderin nəticələrinə dair digər sənədlərin yerləşdirilməsini; bildirişlərin elektron qaydada göndərilməsini; tenderin əsas şərtlər toplusunun, tender prosedurlarını tənzimləyən normativ hüquqi aktların, satınalma müqaviləsinin və digər sənədlərin yerləşdirilməsini; şikayət verilməsini və həmin şikayətə baxılmanın nəticələri barədə qərarın əldə olunmasını; satınalma müqaviləsinin yerinə yetirilməsinin təminatının təqdim olunmasını; hesab-fakturaların satınalan təşkilata təqdim olunmasını; satınalan təşkilatın ödənişlə bağlı təsdiq bildirişi təqdim etməsini; satınalma planının yerləşdirilməsini təmin edir.
