Yeni əsasnamələr
Əmək və Əhalinin Sosial Müdafiəsi Nazirliyinin mərkəzləşdirilmiş elektron informasiya sistemi və “E-sosial” internet portalı haqqında əsasnamələr təsdiqlənib. Fərmanı aprelin 15-də prezident İlham Əliyev imzalayıb.
Novator.az-ın məlumatına görə, mərkəzləşdirilmiş elektron informasiya sisteminin (MEİS) əsas təyinatı əmək, məşğulluq, sosial müdafiə və sosial təminat, habelə Əmək və Əhalinin Sosial Müdafiəsi Nazirliyinin fəaliyyət istiqamətlərinə uyğun olaraq digər sahələrdə informasiyanın yaradılması, toplanması, işlənməsi, saxlanması və axtarışı işlərinin avtomatlaşdırılmasından ibarətdir.
MEİS-in fəaliyyəti “bir pəncərə” prinsipi əsasında yeni texnologiyaların tətbiqi yolu ilə təmin olunur. Onun strukturuna bu altsistemlər daxildir: “Sənəd dövriyyəsi” altsistemi; “Əmək müqaviləsi bildirişi” altsistemi; “Ünvanlı yardım” (VEMTAS) altsistemi; “Sosial ödənişlər” altsistemi; “Əlillik” (TSERAS) altsistemi; “Sığorta” altsistemi; “Monitorinq” altsistemi; “Pensiya” altsistemi; “Məşğulluq” altsistemi; “Sovqat” altsistemi; “Çağrı mərkəzi” altsistemi; “Tapşırıqlar” altsistemi; “Vətəndaşların qəbulu” altsistemi; “Sanatoriya-kurort” altsistemi; “Valideyn himayəsindən məhrum olmuş uşaqlar və övladlığagötürmə” altsistemi; “Qeyri-formal məşğulluğa nəzarət” vahid elektron informasiya ehtiyatı.
“E-sosial” portalı MEİS-də formalaşan məlumatlar əsasında məşğulluq, əmək, sosial müdafiə və sosial təminat, habelə nazirliyin fəaliyyət istiqamətlərinə uyğun olaraq digər sahələrdə əhaliyə göstərilən xidmətlərin vahid platforma üzərindən elektron qaydada təqdim olunmasını, o cümlədən vətəndaşların yaranmış hüquqları əsasında proaktiv formada əməliyyatların aparılmasını və onların həmin əməliyyatlar barədə məlumatlandırılmasını təmin edir.
