Ukraynada yeni seçki sorğusu
Aprelin 21-i Ukraynada prezident seçkisinin ikinci turu keçiriləcək. Seçki bülletenlərində iki şəxsin adı var: şoumen Vladimir Zelenski (ilk turda 30,24% səs yığıb) və prezident Pyotr Poroşenko (ilk turda 15,95% səs yığıb).
Novator.az bildirir ki, Kiyev Beynəlxalq Sosiologiya İnstitutunun ən yeni sorğusuna görə, seçicilərin 48,4%-i Vladimir Zelenskiyə, 17%-i Pyotr Poroşenkoya dəstək verir.
Respondentlərin 17,9%-i kimi dəstəkləmək barədə tərəddüd keçirdiyini deyib, 8,8% -i üstünlük verdiyi namizədin adını çəkmək istəməyib, 6,3%-i seçkiyə getməyəcəyini, 1,6%-i seçki bülletenini korlayacağını vurğulayıb.
Vladimir Zelenski 1978-ci il yanvarın 25-də doğulub. Krivoy Roq İqtisadiyyat İnstitutunu hüquqşünas diplomu ilə bitirib.
1997-ci ildə “95-ci kvartal” şən və hazırcavablar komandası yaradaraq onun kapitanı olub. 2003-cü ildən Ukraynanın “1+1” telekanalı ilə əməkdaşlıq edib, kulinar şounun aparıcısı kimi ad çıxarıb. 2005-ci ildən “İnter” telekanalında axşam şousuna müəlliflik edib, məşhurlaşaraq müxtəlif tamaşalarda, filmlərdə rollar alıb.
1965-ci il sentyabrın 26-da Ukraynanın Odessa vilayətində doğulan Pyotr Poroşenko 1989-cu ildə Kiyev Dövlət Universitetinin beynəlxalq münasibətlər və beynəlxalq hüquq fakültəsini, 1992-ci ildə həmin təhsil ocağının aspiranturasını bitirib. Hüquq elmləri namizədidir.
1993-cü ildən “Ukrprominvest” konserninin baş direktoru, 2002-ci ildən Ukrayna Milli Bankı Şurasının sədr müavini, 2007-ci ildən sədri olub.
2005-ci ildə Milli Təhlükəsizlik və Müdafiə Şurasının katibi, 2009-2010-cu illərdə xarici işlər naziri, 2012-ci ildə iqtisadi inkişaf və ticarət nazir postlarını tutub. 1998, 2002, 2006 və 2012-ci illərin parlament seçkilərində deputat mandatı alıb.
Pyotr Poroşenko 2014-cü il mayın 25-də Ukrayna prezidenti seçilib, iyunun 7-də səlahiyyətlərinin icrasına başlayıb.
