Ticarət göstəriciləri
Dövlət Statistika Komitəsi ticarət hesabatları açıqlayıb. Novator.az bildirir ki, hesabata görə, 2019-cu ilin yanvar-mart aylarında pərakəndə ticarət şəbəkəsində satılmış məhsulların dəyəri əvvəlki ilin eyni dövrünün səviyyəsini müqayisəli qiymətlərlə 2,7 faiz üstələyərək 8,8 milyard manata bərabər olub. Ticarət dövriyyəsinin 4 milyard 472,1 milyon manatını ərzaq məhsulları, içkilər və tütün məmulatları, 4 milyard 371 milyon manatını qeyri-ərzaq məhsulları təşkil edib.
Üç ayda alıcıların son istehlak məqsədilə aldıqları mallara xərclədiyi vəsaitin 45,5 faizi ərzaq məhsullarının, 5,1 faizi içkilər və tütün məmulatlarının, 17,7 faizi toxuculuq məhsulları, geyim və ayaqqabıların, 5,9 faizi elektrik malları və mebellərin, 5,6 faizi avtomobil yanacağının, 1,3 faizi əczaçılıq məhsulları və tibbi malların, 0,7 faizi kompüterlər, telekommunikasiya avadanlıqları və çap məhsullarının, 18,2 faizi digər qeyri-ərzaq məhsullarının alınmasına gedib.
Hesabat rübündə əhalinin bir nəfərinə düşən orta aylıq pərakəndə ticarət dövriyyəsi 298,7 manat göstərilir.
Başqa bir hesabata görə, 2019-cu ilin yanvar-fevral aylarında Azərbaycanın hüquqi və fiziki şəxsləri 144 ölkədəki tərəfdaşları ilə ticarət əməliyyatları həyata keçirib, 86 ölkəyə məhsul ixrac olunub, 138 ölkədən mal alınıb.
İki ayda ölkənin xarici ticarət dövriyyəsi 5 milyard 121,2 milyon ABŞ dolları, o cümlədən ixracın dəyəri 2 milyard 955,4 milyon dollar, idxalın dəyəri 2 milyard 165,8 milyon dollar təşkil edib, 789,6 milyon dollarlıq müsbət ticarət saldosu yaranıb.
2018-ci ilin yanvar-fevral ayları ilə müqayisədə xarici ticarət dövriyyəsi faktiki qiymətlərlə 13 faiz, o cümlədən idxal 49,1 faiz artıb, ixrac 4 faiz azalıb. Real ifadədə dövriyyənin 6,1 faiz, o cümlədən idxalın 18,7 faiz, ixracın 0,1 faiz artdığı bildirilir.
Yanvar-fevral aylarında ölkədən 281,6 milyon dollar dəyərində qeyri-neft məhsulları ixrac edilib, bu da 2018-ci ilin yanvar-fevral aylarına nisbətən faktiki qiymətlərlə 16,5 faiz, real ifadədə isə 10,3 faiz çoxdur.
