Sənayedə artım, sərmayədə azalma var
Sənaye müəssisələri və bu sahədə fəaliyyət göstərən fərdi sahibkarlar 2019-cu ilin yanvar-mart aylarında 11,5 milyard manatlıq və ya 2018-ci ilin birinci rübü ilə müqayisədə 4,4 faiz çox sənaye məhsulu istehsal edib. Sənayenin qeyri-neft sektorunda məhsul istehsalı 15,6 faiz artıb. Novator.az-ın məlumatına görə, Dövlət Statistika Komitəsi belə hesabat yayıb.
Başqa bir hesabata əsasən, yanvar-mart aylarında ölkənin iqtisadi və sosial sahələrinin inkişafı üçün əsas kapitala 2 milyard 699,7 milyon manat və ya əvvəlki ilin müvafiq dövrü ilə müqayisədə 9 faiz az vəsait yönəldilib. Qeyri-neft sektoruna yönəldilmiş vəsaitin həcmində 6 faiz artım qeydə alınıb. Daxili mənbələrdən əsas kapitala yönəldilmiş vəsait ümumi sərmayənin 67,3 faizini təşkil edib.
Sərmayənin ümumi dəyərində müəssisə və təşkilatların vəsaitləri 65,6 faiz, büdcə vəsaitləri 21,8 faiz, əhalinin şəxsi vəsaitləri 6,5 faiz, bank kreditləri 5 faiz, büdcədənkənar fondların vəsaitləri 0,8 faiz, sair vəsaitlər 0,3 faiz göstərilir.
