Qiymətlər və orta maaş nə qədər artıb?
Dövlət Statistika Komitəsi inflyasiya hesabatı yayıb. Novator.az-ın məlumatına görə, bildirilir ki, 2019-cu ilin yanvar-mart aylarında istehlak məhsullarının və xidmətlərin qiymətləri 2018-ci ilin müvafiq dövrünə nisbətən 2,1 faiz artıb.
Ərzaq məhsulları, içkilər və tütün məmulatlarının 1,5 faiz, qeyri-ərzaq mallarının 1,2 faiz, əhaliyə göstərilən ödənişli xidmətlərin 3,6 faiz bahalaşdığı vurğulanır.
Komitə qeyd edir ki, mart ayında istehlak məhsullarının və xidmətlərin qiymətləri fevral ayına nisbətən 0,6 faiz, o cümlədən ərzaq məhsulları, içkilər və tütün məmulatlarının qiymətləri 1,3 faiz, qeyri-ərzaq mallarının və əhaliyə göstərilən ödənişli xidmətlərin qiymətləri 0,1 faiz yüksəlib.
Başqa bir hesabata əsasən, 2019-cu il martın 1-nə ölkə iqtisadiyyatında muzdla çalışan işçilərin sayı 1 milyon 534,3 min nəfər olub, onların 865,3 min nəfəri iqtisadiyyatın dövlət sektorunda, 669 min nəfəri qeyri-dövlət sektorunda fəaliyyət göstərib.
Yanvar-fevral aylarında ölkə iqtisadiyyatında muzdla çalışan işçilərin orta aylıq nominal əməkhaqqının əvvəlki ilin müvafiq dövrünə nisbətən 8,6 faiz artaraq 554,9 manata çatdığı bildirilir.
