Hərracda qiymət yüksəlişləri
Əmlak Məsələləri Dövlət Komitəsinin 16 aprel hərracında kiçik dövlət müəssisəsi, qeyri-yaşayış sahələri və nəqliyyat vasitələri özəlləşdirilib.
Rəsmi məlumata görə, Bakının Xətai rayonunun General Mehmandarov küçəsindəki binanın qeyri-yaşayış sahəsinin ilkin qiyməti 3 min göstərilib. Ümumi faydalı sahəsi 28,6 kvadratmetr olan obyektə 10 min 300 manat ödənib.
Paytaxtın Bilgəh qəsəbəsinin Azərbaycan qadını küçəsindəki ticarət obyekti (ümumi faydalı sahəsi 125,2 kvadratmetr) hərracda 14 min manata satılıb.
Hərracda 10 nəqliyyat vasitəsi üzrə 41 sifariş verilib. 2007-ci ildə buraxılmış “Nissan Sunny” markalı avtomobil üçün 4 min manat ilkin qiymət təyin edilib, dövlət əmlakının qiyməti 7 min 200 manata yüksəlib.
“Mercedes Benz”in hərrac qiyməti 7 min manatdan 11 min manata qalxıb, “Mitsubishi”, “Hyundai”, “Nissan” və “BMW” markalarından olan digər nəqliyyat vasitələri (buraxılış tarixləri 2004-2008-ci illər) 4 min 500 manatla 11 min 800 manat aralığında qiymətlərə özəlləşdirilib.
