Qarabağ Komitəsi mitinq gününü dəyişdi
Qarabağ Komitəsi aprelin 20-nə planlaşdırdığı mitinqdən imtina edib. Novator.az-ın məlumatına görə, komitənin aprelin 15-də keçirilən növbədənkənar toplantısında aksiya mayın 4-nə keçirilib. Bakı Şəhər İcra Hakimiyyətinə müraciətdə mitinqi Yasamal rayonundakı İdman-Sağlamlıq Kompleksinin stadionunda keçirmək istəyi yer alır.
Mitinq günü Demokratik Qüvvələrin Milli Şurasının aksiyasına görə dəyişdirilib. Qarabağ Komitəsi və Milli Şura aprelin 20-nə mitinqlər təyin etmiş, hər iki qurum Bakı Şəhər İcra Hakimiyyətinə müraciətdə aksiyanı paytaxtın Yasamal rayonundakı İdman-Sağlamlıq Kompleksinin stadionunda, saat 15-dən 17-dək keçirmək istədiyini bildirmişdi.
Bir qrup ictimai-siyasi xadimin ötən il yaratdığı Qarabağ Komitəsinin İdarə Heyətində İlham İsmayıl, Pənah Hüseyn, Mirmahmud Mirəlioğlu, Tural Abbaslı, Əvəz Zeynallı, Sahib Kərimli, Taleh Əliyev, Felmar Ələkbərov və Əlövsət Sadıqov təmsil olunurlar.
2013-cü ildə yaradılmış Milli Şuraya tarixçi alim Cəmil Həsənli sədrlik edir. Qurumun öncül şəxsləri arasında AXCP sədri Əli Kərimli, Müsavat Partiyasından Tofiq Yaqublu, Vətəndaş Həmrəyliyi Partiyasından Rafiq Manaflı, Qarabağ Uğrunda İslami Müqavimət Hərəkatından Rövşən Əhmədli, sabiq deputatlar İbrahim İbrahimli, Gültəkin Hacıbəyli və başqaları var.
